खेड : कायद्याच्या किचकट आणि गुंतागुंतीच्या वाटांवर आपल्या अफाट बुद्धिमत्तेचा आणि सखोल अभ्यासाचा ठसा उमटवणारे खेड तालुक्यातील एक तल्लख तरुण व्यक्तिमत्त्व म्हणजे सैफ सुलतान चौगुले.
आता त्यांच्या याच प्रगल्भ विधी ज्ञानाची दखल घेत कोकण मर्कटाईल को-ऑपरेटिव्ह बँकेने त्यांच्यावर पॅनल अधिवक्ता या महत्त्वपूर्ण पदाची जबाबदारी सोपवली आहे.
या नियुक्तीची अधिकृत घोषणा बँक व्यवस्थापनाने नुकतीच केली असून, खेडच्या विधी क्षेत्रात या अचूक निवडीचे मोठे कौतुक होत आहे.
कायद्याचे अचूक मर्म जाणणारे आणि आपल्या धारदार युक्तिवादाने भल्याभल्यांना विचार करायला लावणारे सैफ चौगुले आता बँकेच्या प्रगतीसाठी आणि कायदेशीर कल्याणासाठी आपले कसब पणाला लावणार आहेत.
बँकेशी निगडित असलेले सर्व कायदेशीर प्रश्न, अत्यंत गुंतागुंतीचे खटले आणि महत्त्वपूर्ण सल्लामसलत यापुढे त्यांच्याच कुशल मार्गदर्शनाखाली हाताळली जाईल.
कोकणातील सहकार चळवळीला एका नव्या उंचीवर नेऊन ठेवण्यात कोकण मर्कटाईल बँकेचा वाटा सिंहाचा राहिला आहे.
याच सहकाराच्या रोपट्याला कायद्याचे भक्कम कुंपण घालण्याचे काम सैफ चौगुले आपल्या प्रगल्भ बुद्धिमत्तेने करतील आणि त्यांच्या या योगदानामुळे बँकेची घोडदौड अधिकच निर्धोक व वेगवान होईल, असा ठाम विश्वास सर्वत्र व्यक्त केला जात आहे.
तारुण्याच्या सळसळत्या उत्साहाला अभ्यासाची जोड देत विधी क्षेत्रात अल्पावधीतच आपला स्वतंत्र दबदबा निर्माण करणाऱ्या सैफ चौगुले यांच्या या गौरवास्पद निवडीवर सध्या अभिनंदनाचा वर्षाव होत आहे.
बँकेचे संपूर्ण संचालक मंडळ, सर्व अधिकारी वर्ग, अफाट ग्राहकवर्ग आणि हितचिंतकांनी त्यांच्या या नव्या आणि अत्यंत जबाबदारीच्या प्रवासाला भरभरून शुभेच्छा दिल्या आहेत.