दापोली: तालुक्यातील तामसतीर्थ येथील व्ही. के. जोशी हायस्कूलमध्ये शुक्रवार, २६ जून रोजी समाजसुधारक, शिक्षणमहर्षी, लोककल्याणकारी राजे आणि सामाजिक न्यायाचे प्रणेते राजर्षी छत्रपती शाहू महाराज यांच्या १५२ व्या जयंतीनिमित्त एका प्रेरणादायी कार्यक्रमाचे आयोजन करण्यात आले होते.
कार्यक्रमाच्या प्रारंभी शाळेचे मुख्याध्यापक सुनील जोशी यांच्या हस्ते शाहू महाराजांच्या प्रतिमेस पुष्पहार अर्पण करून विनम्र अभिवादन करण्यात आले. त्यानंतर उपस्थित सर्व शिक्षक आणि शिक्षकेतर कर्मचाऱ्यांनीही प्रतिमेचे पूजन करून अभिवादन केले.
यावेळी विद्यार्थ्यांना मार्गदर्शन करताना मुख्याध्यापक सुनील जोशी यांनी राजर्षी शाहू महाराजांचे शिक्षणप्रेम, सामाजिक समता, स्त्रीशिक्षण, आरक्षण धोरण, बहुजन समाजाच्या उन्नतीसाठी केलेले कार्य आणि त्यांच्या लोककल्याणकारी राज्यकारभाराचा आढावा घेतला. शिक्षण हेच समाजपरिवर्तनाचे सर्वात प्रभावी साधन असून समता, बंधुता आणि मानवतेची मूल्ये प्रत्येक विद्यार्थ्याने आपल्या जीवनात जोपासली पाहिजेत, असे प्रतिपादन त्यांनी केले.
या कार्यक्रमास ज्येष्ठ शिक्षक सतीश कोकणे यांच्यासह शाळेतील सर्व शिक्षकवृंद तसेच शिक्षकेतर कर्मचारी उपस्थित होते. राजर्षी छत्रपती शाहू महाराजांच्या विचारांचा जागर करून सामाजिक समता, शिक्षणाचा प्रसार आणि मानवतेचा संदेश विद्यार्थ्यांपर्यंत पोहोचवणाऱ्या या प्रेरणादायी कार्यक्रमाची सांगता अत्यंत उत्साहपूर्ण वातावरणात झाली.
बहुजन हिताय, बहुजन सुखाय या महान विचारांचा वारसा जपत सामाजिक न्याय, समता आणि शिक्षणाचा दीप अखंड तेवत ठेवणाऱ्या राजर्षी छत्रपती शाहू महाराजांना यावेळी सर्वांनी कृतज्ञतापूर्वक अभिवादन केले.