रत्नागिरी : दरवर्षी १० जुलै हा ‘राष्ट्रीय मत्स्य शेतकरी दिन’ म्हणून साजरा केला जातो. या निमित्ताने रत्नागिरी शोभिवंत मत्स्य शेतकरी संस्था आणि मत्स्य महाविद्यालय यांच्या संयुक्त विद्यमाने ११ जुलै २०२५ रोजी सकाळी ९:३० ते सायंकाळी ५:३० या वेळेत “शोभिवंत मत्स्य शेतीतील उद्योजगता विकास: समस्या आणि उपाय” या विषयावर राज्यस्तरीय कार्यशाळा यशस्वीपणे संपन्न झाली.
या कार्यशाळेत महाराष्ट्र, गोवा आणि बेळगाव-कर्नाटक येथील २०० शोभिवंत मत्स्य शेतकऱ्यांनी उत्स्फूर्त सहभाग घेतला.
उद्घाटन समारंभ: कार्यशाळेचे उद्घाटन मत्स्य महाविद्यालयाचे सहयोगी अधिष्ठाता डॉ. अ. सा. पावसे, रत्नागिरी शोभिवंत मत्स्य शेतकरी संस्थेचे अध्यक्ष फहद जमादार, मत्स्य अभियांत्रिकी तंत्रनिकेतनचे प्राचार्य डॉ. केतन चौधरी, मत्स्य जल शास्त्र आणि जीव शास्त्र विभागाचे प्रमुख डॉ. आसिफ पागारकर, मिरकरवाडा मत्स्य व्यवसाय प्राधिकरणच्या मत्स्य विकास अधिकारी अक्षया मयेकर, वरिष्ठ शोभिवंत मत्स्य शेतकरी हसन मसलाई आणि मत्स्य विस्तार शिक्षण विभाग प्रमुख डॉ. द. इ. पठाण यांच्या शुभहस्ते दीपप्रज्वलनाने झाले.
प्रास्ताविक डॉ. द. इ. पठाण यांनी केले, तर अध्यक्षीय भाषणात डॉ. अ. सा. पावसे यांनी शोभिवंत मत्स्य शेतकरी संस्थेच्या उपक्रमाचे कौतुक करत महाविद्यालयाकडून सर्वतोपरी सहकार्याचे आश्वासन दिले.
संस्थेची भूमिका: कोकणातील शोभिवंत मत्स्य शेतीच्या विकासासाठी स्थापन झालेली रत्नागिरी शोभिवंत मत्स्य शेतकरी संस्था शेतकऱ्यांच्या सर्वांगीण प्रगतीसाठी कार्यरत आहे. विविध कार्यक्रमांद्वारे शेतकऱ्यांना तांत्रिक आणि व्यावसायिक मार्गदर्शन पुरवले जाते.
कार्यशाळेतील मार्गदर्शन: केंद्रीय मत्स्यकी शिक्षण संस्थेच्या शास्त्रज्ञ डॉ. माधुरी पाठक यांनी शोभिवंत मत्स्य शेतीची सद्यस्थिती आणि भविष्यातील वाटचाल यावर मार्गदर्शन केले. डॉ. गजानन घोडे यांनी मासळींवरील रोग आणि उपाययोजनांविषयी माहिती दिली.
महाराष्ट्र शासनाच्या मत्स्य व्यवसाय विभागाच्या सहाय्यक मत्स्य व्यवसाय विकास अधिकारी उत्कर्षा कीर यांनी शासकीय योजनांबाबत सविस्तर माहिती दिली.
तारापोरवाला सागरी मत्स्य शास्त्रीय संशोधन केंद्राचे शास्त्रज्ञ डॉ. भरत यादव यांनी संशोधनाविषयी, तर सागरी पदार्थ निर्यात विकास प्राधिकरणाचे मंगेश गावडे यांनी निर्यातदार नोंदणीबाबत मार्गदर्शन केले.
ग्रोवेल मत्स्य खाद्य कंपनीचे मॅथुज यांनी मत्स्य खाद्य व्यवस्थापन, पुण्याचे योगेश मोडक यांनी अॅक्वारीयम प्रकाश योजनांबाबत आणि अमित देवारे यांनी अॅक्वा-स्केपिंगबाबत माहिती दिली.
सन्मान सोहळा: कार्यशाळेत मुंबईतील वरिष्ठ शोभिवंत मत्स्य पालक श्रीराम हतवळणे आणि विस्पी मिस्त्री यांना जीवनगौरव पुरस्काराने सन्मानित करण्यात आले. त्यांनी संस्थेचे आभार मानत नवीन शेतकऱ्यांना मार्गदर्शनाचे आश्वासन दिले.
संस्थेच्या योजना: संस्थेचे तांत्रिक सल्लागार आणि मत्स्य अभियांत्रिकी तंत्रनिकेतनचे प्राचार्य डॉ. केतन चौधरी यांनी संस्थेचे उद्दिष्ट, गेल्या वर्षातील कामगिरी आणि पुढील योजनांचा आढावा सादर केला. पुढील वर्षी जुलै २०२६ मध्ये दोन दिवसीय चर्चासत्र आणि बिझनेस मिटिंग आयोजित करण्याचे ठरले.
आभार प्रदर्शन: संस्थेचे अध्यक्ष फहद जमादार यांनी सर्वांचे आभार मानले. डॉ. बाळासाहेब सावंत कोकण कृषी विद्यापीठाचे कुलगुरू डॉ. संजय भावे, विस्तार शिक्षण संचालक डॉ. मकरंद जोशी, शिक्षण संचालक डॉ. सतीश नारखेडे आणि कुलसचिव डॉ. संतोष सावर्डेकर यांच्या मार्गदर्शनाखाली कार्यक्रम यशस्वी झाला. सूत्रसंचालन डॉ. सुहास वासावे आणि हसन मसलाई यांनी केले.
सहभागी आणि सहकार्य: कार्यशाळेच्या आयोजनात मत्स्य महाविद्यालयातील डॉ. डबीर पठाण, डॉ. ए. यु. पागारकर, डॉ. भावेश सावंत, मकरंद शारंगधर, विनायक विश्वासराव, डॉ. संदेश पाटील, भालचंद्र नाईक, सागरी जीव-शास्त्रीय संशोधन केंद्राचे सचिन साटम आणि डॉ. हरीश धमगाये यांचे सहकार्य लाभले. संस्थेचे उपाध्यक्ष राकेश सावंत, खजिनदार दिव्यजीत गोरे, सदस्य राजकिरण साटम, अमित आणि अविनाश सुवारे, परेश पाटील, राजकुमार कोळी, चेतन साळुंखे, सुरेंद्र शिरधनकर आणि हसन मसलाई यांनी आयोजनासाठी विशेष कष्ट घेतले.
शेतकऱ्यांचा विश्वास: या कार्यशाळेमुळे शोभिवंत मत्स्य शेतीच्या समस्यांचे निराकरण होण्यास मोठी मदत होईल आणि कोकण तसेच महाराष्ट्रातील या उद्योगाला चालना मिळेल, असा विश्वास सहभागी शेतकऱ्यांनी व्यक्त केला.