दापोली : रत्नागिरी जिल्ह्यातील दापोली तालुक्यातील लाडघर येथे एक धक्कादायक घटना घडली आहे.
इलेक्ट्रिकलचे काम करणाऱ्या 51 वर्षीय स्नेहल सुभाष भोळे (रा. लाडघर, पार्थादेवी वाडी, ता. दापोली, जि. रत्नागिरी) यांचा विजेच्या खांबावर चढताना हृदयविकाराच्या तीव्र झटक्याने मृत्यू झाला.
ही घटना मंगळवारी (5 ऑगस्ट 2025) दुपारी लाडघर गावात घडली.
दापोली पोलिसांनी दिलेल्या माहितीनुसार, स्नेहल भोळे हे गाव परिसरात विजेच्या खांबांवरील पथदिवे बदलण्याचे काम करत होते.
लाडघर येथे पथदिवे बदलण्यासाठी ते शिडी घेऊन विजेच्या खांबावर चढले. शिडीच्या दोन-तीन पायऱ्या चढल्यानंतर अचानक त्यांना अस्वस्थ वाटले आणि ते खाली कोसळले.
त्यांच्या पडण्याचा मोठा आवाज ऐकून जवळच्या घरातील लोक बाहेर आले. स्नेहल भोळे खांबावरून खाली पडलेले दिसले.
ग्रामस्थांनी तातडीने त्यांना दापोली येथील उपजिल्हा रुग्णालयात दाखल केले, परंतु डॉक्टरांनी त्यांना मृत घोषित केले.
सुरुवातीला त्यांच्या मृत्यूचे कारण विजेचा धक्का असल्याचा संशय व्यक्त केला जात होता.
मात्र, वैद्यकीय शवविच्छेदन अहवालात त्यांचा मृत्यू हृदयविकाराच्या तीव्र झटक्याने झाल्याचे स्पष्ट झाले. स्नेहल भोळे हे मूळचे रत्नागिरीतील जाकादेवी येथील रहिवासी होते.
लाडघर येथे नातेवाइकांमुळे त्यांनी घर बांधले होते आणि ते एकटेच येथे राहत होते. त्यांचे कुटुंब मुंबई येथे आहे.
स्नेहल भोळे हे मदतशील आणि सौम्य स्वभावाचे व्यक्तिमत्व म्हणून परिसरात ओळखले जायचे.
त्यांच्या अकस्मात निधनाने लाडघर परिसरात शोककळा पसरली आहे. या घटनेची नोंद दापोली पोलीस ठाण्यात करण्यात आली असून, पोलिस अधिक तपास करत आहेत.