शिवसेनेच्या रत्नागिरी उपजिल्हाप्रमुखपदी गजानन पाटील यांची निवड, कार्यकर्त्यांमध्ये उत्साह

रत्नागिरी : महाराष्ट्राचे उपमुख्यमंत्री एकनाथ शिंदे यांच्या मार्गदर्शनाखाली आणि उद्योग व मराठी भाषा मंत्री तसेच रत्नागिरी जिल्ह्याचे पालकमंत्री उदय सामंत आणि आमदार किरण सामंत यांच्या उपस्थितीत नुकतीच शिवसेनेची रत्नागिरी जिल्हा कार्यकारणी जाहीर झाली. या कार्यकारणीत विविध महत्त्वाच्या पदांची घोषणा करण्यात आली असून, त्यामध्ये रत्नागिरी तालुक्यातील शिवसैनिक गजानन कमलाकर पाटील, ज्यांना आबा पाटील म्हणूनही ओळखले जाते, यांची उपजिल्हाप्रमुखपदी निवड झाली आहे. या निवडीमुळे शिवसेना कार्यकर्त्यांमध्ये उत्साहाचे वातावरण पसरले आहे.

गजानन पाटील गेल्या अनेक वर्षांपासून उदय सामंत आणि किरण सामंत यांच्यासोबत काम करत आहेत. समाजसेवेच्या माध्यमातून राजकारणात प्रवेश करणाऱ्या पाटील यांनी यापूर्वी अनेक महत्त्वाच्या जबाबदाऱ्या यशस्वीपणे पार पाडल्या आहेत. उदय सामंत यांनी त्यांच्यावर सातत्याने विश्वास दाखवत विविध पदांवर काम करण्याची संधी उपलब्ध करून दिली. या संधींचा आदर राखत पाटील यांनी आपल्या अभ्यासपूर्ण दृष्टिकोन आणि कौशल्याने प्रत्येक पदाचा मान वाढवला. त्यांच्या या कार्याची दखल घेत शिवसेनेने त्यांना रत्नागिरी उपजिल्हाप्रमुखपदाची जबाबदारी सोपवली आहे.

आपल्या निवडीबाबत बोलताना गजानन पाटील म्हणाले, “गेल्या अनेक वर्षांपासून उदय सामंत आणि किरण सामंत यांच्या मार्गदर्शनाखाली समाजकारण आणि राजकारणात काम करण्याची संधी मला मिळाली. त्यांनी माझ्यावर दाखवलेल्या विश्वासाला मी नेहमीच पात्र ठरविण्याचा प्रयत्न केला आहे. यापूर्वी मला सोपवण्यात आलेल्या जबाबदाऱ्या मी प्रामाणिकपणे पार पाडल्या. आता उपजिल्हाप्रमुख या नव्या जबाबदारीच्या माध्यमातूनही शिवसेनेचे विचार आणि पक्षाचे प्राबल्य वाढवण्यासाठी मी कटिबद्ध आहे. एकनाथ शिंदे, उदय सामंत, किरण सामंत आणि अण्णा सामंत यांच्या मार्गदर्शनाखाली रत्नागिरी जिल्ह्यात पक्षाची ताकद वाढवण्यासाठी मी सर्वतोपरी प्रयत्न करेन.”

गजानन पाटील यांच्या या निवडीमुळे रत्नागिरी जिल्ह्यातील शिवसैनिकांमध्ये आनंद आणि उत्साहाचे वातावरण आहे. त्यांच्या कार्याची आणि पक्षनिष्ठेची प्रशंसा सर्व स्तरांतून होत आहे. पाटील यांनी यापूर्वी समाजसेवेच्या माध्यमातून सामान्य नागरिकांच्या समस्या सोडवण्यात महत्त्वाची भूमिका बजावली आहे. त्यांच्या नेतृत्वाखाली रत्नागिरी तालुक्यातील शिवसेनेच्या कार्याला नवी गती मिळेल, असा विश्वास कार्यकर्त्यांमध्ये आहे.

या निवडीमुळे शिवसेनेच्या स्थानिक पातळीवरील संघटनात्मक बांधणीला बळ मिळणार आहे. गजानन पाटील यांच्या अनुभवाचा आणि नेतृत्वाचा फायदा पक्षाला निश्चितच होईल, अशी अपेक्षा व्यक्त केली जात आहे. रत्नागिरी जिल्ह्यातील शिवसैनिकांनी त्यांच्या निवडीचे स्वागत केले असून, पक्षाच्या भविष्यातील योजनांना गती देण्यासाठी ते सज्ज झाले आहेत.