दापोली: रत्नागिरी जिल्हा पोलीस दलात आपल्या कर्तव्यनिष्ठेने आणि प्रामाणिक कामाने वेगळा ठसा उमटवणारे दापोली पोलीस ठाण्याचे अंमलदार उदय केशव टेमकर यांचा नुकताच जिल्हा स्तरावर विशेष सन्मान करण्यात आला.
रत्नागिरी पोलीस अधीक्षक कार्यालयात पार पडलेल्या मासिक गुन्हे आढावा बैठकीत त्यांच्या या उल्लेखनीय कामगिरीची वरिष्ठ पातळीवर दखल घेण्यात आली.
दापोली शहरासह परिसरातील कायदा व सुव्यवस्था अबाधित राखण्यात उदय टेमकर यांनी सातत्याने मोलाची भूमिका बजावली आहे.
गुन्ह्यांचा तपास लावण्यातील त्यांची तत्परता, कामाप्रती असलेली निष्ठा आणि नागरिकांशी असलेला त्यांचा सुसंवाद यामुळे त्यांनी पोलीस दलात आपली एक वेगळी ओळख निर्माण केली आहे.
केवळ गुन्हेगारीला आळा घालणेच नव्हे, तर सर्वसामान्य नागरिकांना पोलिसांबद्दल विश्वास वाटावा अशा पद्धतीचे त्यांचे कामकाज राहिले आहे.
वरिष्ठांनी दिलेल्या सूचनांचे तंतोतंत पालन करत दापोली पोलीस ठाण्याच्या हद्दीत त्यांनी बजावलेल्या याच समर्पित सेवेचे फळ म्हणून त्यांना या विशेष प्रशस्तीपत्राने सन्मानित करण्यात आले आहे.
रत्नागिरी येथील पोलीस अधीक्षक कार्यालयात आयोजित करण्यात आलेल्या या कार्यक्रमात पोलीस अधीक्षक नितीन बगाटे आणि अपर पोलीस अधीक्षक बी. बी. महामुनी यांच्या प्रमुख उपस्थितीत हा गौरव सोहळा पार पडला.
यावेळी जिल्ह्यातील अनेक वरिष्ठ पोलीस अधिकारी आणि अंमलदार उपस्थित होते. या मान्यवरांच्या हस्ते उदय टेमकर यांना प्रशस्तीपत्र प्रदान करून त्यांच्या पाठीवर शाबासकीची थाप देण्यात आली.
आपल्या असामान्य कर्तृत्वाने आणि सातत्यपूर्ण मेहनतीने मिळवलेला हा सन्मान दापोली पोलीस ठाण्यासाठी आणि त्यांच्या सर्व सहकाऱ्यांसाठी अत्यंत अभिमानाची बाब ठरली आहे.
या सत्कारामुळे उदय टेमकर यांच्यावरील जबाबदारी अधिकच वाढली असून, त्यांना मिळालेल्या या यशाचे दापोलीतील नागरिकांमधून आणि संपूर्ण पोलीस वर्तुळातून मोठ्या प्रमाणावर कौतुक केले जात आहे.
एका कर्तव्यदक्ष अंमलदाराचा झालेला हा सन्मान इतर पोलीस कर्मचाऱ्यांसाठीही प्रेरणादायी ठरणार आहे.
Leave a Reply