गुहागर : पुणे येथे ४ ऑक्टोबर २०२६ रोजी पार पडलेल्या प्रतिष्ठित ‘विंटरन पुणे’ या मॅरेथॉन स्पर्धेत गुहागर तालुक्याचे सुपुत्र अनंत तानकर यांनी घवघवीत यश संपादन केले आहे.
त्यांनी २१ किलोमीटर अंतराची शर्यत अवघ्या १ तास ३९ मिनिटांत पूर्ण करत या स्पर्धेत द्वितीय क्रमांक पटकावला आहे.
अनंत तानकर यांच्या या नेत्रदीपक कामगिरीमुळे गुहागर तालुक्याचे नाव राज्याच्या क्रीडा क्षेत्रात उंचावले गेले आहे.
तानकर यांच्या या यशामागे त्यांची अफाट मेहनत, जिद्द आणि सातत्यपूर्ण सराव असल्याचे क्रीडा क्षेत्रातून बोलले जात आहे.
धावण्याची आवड आणि कठोर परिश्रम करण्याची तयारी असल्यास कोणतेही शिखर सर करता येते, हे त्यांनी आपल्या कृतीतून पुन्हा एकदा सिद्ध केले आहे.
या उल्लेखनीय यशाबद्दल क्रीडा प्रेमी तसेच गुहागर तालुक्यातील नागरिकांकडून अनंत तानकर यांच्यावर अभिनंदनाचा वर्षाव होत असून त्यांच्या पुढील वाटचालीस भरघोस शुभेच्छा दिल्या जात आहेत.