जंगलातील रहस्यमय मृत्यू: मुरुड-दापोलीजवळ ३६ वर्षीय व्यक्ती मृत आढळला!

दापोली:- तालुक्यातील मुरूड येथील जंगलमय भागात एका ३६ वर्षीय तरुणाचा गळफास घेतलेल्या अवस्थेत मृतदेह आढळून आला आहे.

या तरुणाचे नाव राजू नामदेव पवार असून, तो विजापूर-कुन्नर येथील रहिवासी होता, अशी माहिती समोर आली आहे. या घटनेने परिसरात खळबळ उडाली असून, दापोली पोलिसांनी याप्रकरणी तपास सुरू केला आहे.

दापोली पोलिसांनी दिलेल्या माहितीनुसार, फिर्याद देणाऱ्याने मुरूड सडा येथे तलाव खणण्याचे काम हाती घेतले होते. या कामासाठी त्यांनी भाड्याने घेतलेल्या पोकलेन मशिनवर राजू पवार हा काम करत होता. १२ मार्च रोजी रात्री ९:३० वाजण्याच्या सुमारास राजू कामावरून निघून गेला होता.

मात्र, त्यानंतर तो परत कामावर आला नाही. जवळपास दोन आठवड्यांनंतर, २७ मार्च रोजी सायंकाळी ६ वाजण्याच्या सुमारास सुरेश चव्हाण यांनी तलावाच्या खोदकामासमोरील जंगलमय भागातून उग्र वास येत असल्याचे सांगितले.

ही बाब फिर्यादी आणि पोलीस पाटील समीर बाळ यांच्या निदर्शनास आणून देण्यात आली.

या माहितीवरून फिर्यादी आणि ग्रामस्थांनी जंगलात जाऊन पाहणी केली असता, एका झाडाच्या फांदीला दोरीने लटकलेल्या अवस्थेत कुजलेला मृतदेह आढळला.

मृतदेहाच्या कपड्यांवरून आणि बाजूला पडलेल्या पोकलेनच्या चावीवरून त्याची ओळख पटली. हा मृतदेह राजू नामदेव पवार याचाच असल्याचे स्पष्ट झाले.

घटनास्थळावरून मिळालेल्या पुराव्यांवरून पोलिसांनी आत्महत्येचा संशय व्यक्त केला असून, याप्रकरणी दापोली पोलीस ठाण्यात नोंद करण्यात आली आहे.

या घटनेमुळे विजापूर-कुन्नर परिसरात शोककळा पसरली आहे. राजूच्या कुटुंबीयांचा आक्रोश पाहून गावकऱ्यांनीही संवेदना व्यक्त केल्या आहेत.

दापोली पोलिसांनी मृतदेह शवविच्छेदनासाठी पाठवला असून, या प्रकरणाचा सखोल तपास सुरू आहे. घटनेचे नेमके कारण अद्याप स्पष्ट झालेले नाही.

पोलिसांनी ग्रामस्थ आणि साक्षीदारांचे जबाब नोंदवण्यास सुरुवात केली आहे.