तालुकास्तरीय कबड्डी स्पर्धेत टाळसुरे विद्यालय अजिंक्य, जिल्हास्तरीय स्पर्धेसाठी पात्र

दापोली : क्रीडा व युवक सेवा संचालनालय, महाराष्ट्र राज्य पुणे यांच्या अंतर्गत जिल्हा क्रीडा परिषद रत्नागिरी आणि जिल्हा क्रीडा अधिकारी कार्यालय रत्नागिरी यांच्या संयुक्त विद्यमाने आयोजित तालुकास्तरीय कबड्डी स्पर्धेत सह्याद्री शिक्षण संस्था सावर्डे संचलित न्यू इंग्लिश स्कूल अँड ज्युनियर कॉलेज टाळसुरे यांच्या 17 वर्षाखालील मुलांच्या कबड्डी संघाने अजिंक्यपद पटकावले.

या विजयासह टाळसुरे विद्यालयाच्या संघाला दापोली तालुक्याचे प्रतिनिधित्व करत जिल्हास्तरीय स्पर्धेत सहभागी होण्याची संधी मिळाली आहे.

गावतळे हायस्कूल येथे आयोजित या स्पर्धेत उपांत्यपूर्व फेरीत टाळसुरे विद्यालय आणि ए. जी. हायस्कूल, दापोली यांच्यात चुरशीची लढत झाली. या अटीतटीच्या सामन्यात टाळसुरे विद्यालयाने 4 गुणांच्या फरकाने विजय मिळवत अंतिम फेरीत प्रवेश निश्चित केला.

अंतिम फेरीत टाळसुरे विद्यालयाचा सामना एन. डी. गोळे हायस्कूल, हर्णे यांच्याशी झाला. श्रेयश लाले, स्वीतीश लाले, वेदांत शिगवण आणि प्रभात पिंपळकर यांच्या उत्कृष्ट खेळाच्या जोरावर टाळसुरे विद्यालयाने 15 गुणांच्या मोठ्या फरकाने विजय मिळवला आणि तालुकास्तरीय अजिंक्यपदावर नाव कोरले.

या यशाबद्दल सह्याद्री शिक्षण संस्था सावर्डेचे कार्याध्यक्ष, चिपळूण-संगमेश्वरचे विद्यमान आमदार शेखर निकम, सचिव महेश महाडिक, संचालक शांताराम खानविलकर, शालेय समितीचे अध्यक्ष जयवंत जालगावकर, अशोक जाधव, विद्यालयाचे मुख्याध्यापक संदेश राऊत, मार्गदर्शक दीपनंदा बोधे, जीवन गुहागरकर, सुयोग लाले आणि महेश लाले यांनी संघाचे अभिनंदन केले. स्पर्धेच्या यशस्वी आयोजनासाठी दापोली तालुका क्रीडा समन्वयक सत्यवान दळवी, बिपिन मोहिते, अशितोष साळुंखे आणि संदीप क्षीरसागर यांनी विशेष परिश्रम घेतले.