दापोली : सह्याद्री शिक्षण संस्था सावर्डे संचलित न्यू इंग्लिश स्कूल अँड ज्युनियर कॉलेज, टाळसुरे येथील विद्यार्थिनी शाल्मली माने हिने तालुकास्तरीय बुद्धिबळ स्पर्धेत १७ वर्षीय वयोगटात प्रथम क्रमांक मिळवून आपल्या क्रीडा कौशल्याची चुणूक दाखवली आहे.
क्रीडा व युवक सेवा संचालनालय, महाराष्ट्र राज्य, पुणे यांच्या अंतर्गत रत्नागिरी जिल्हा क्रीडा परिषद आणि जिल्हा क्रीडा अधिकारी कार्यालय यांच्या संयुक्त विद्यमाने आयोजित या स्पर्धेत शाल्मलीने उत्कृष्ट कामगिरी करत प्रथम स्थान पटकावले.
या यशामुळे तिची रत्नागिरी जिल्हास्तरीय बुद्धिबळ स्पर्धेसाठी निवड झाली असून, ती दापोली तालुक्याचे प्रतिनिधित्व करणार आहे.
या स्पर्धेत शाल्मलीने आपल्या बुद्धिमत्तेचा आणि रणनितीचा उत्कृष्ट वापर करत प्रतिस्पर्ध्यांना मात दिली. तिच्या या यशामुळे टाळसुरे गावासह संपूर्ण दापोली तालुक्याला अभिमान वाटत आहे.
जिल्हास्तरीय स्पर्धेतही ती आपली विजयी घोडदौड कायम राखेल, अशी अपेक्षा व्यक्त केली जात आहे.
सह्याद्री शिक्षण संस्थेचे कार्याध्यक्ष, चिपळूण-संगमेश्वरचे विद्यमान आमदार शेखर निकम, सचिव महेश महाडिक, संचालक शांताराम खानविलकर, शालेय समितीचे अध्यक्ष जयवंत जालगावकर, विद्यालयाचे मुख्याध्यापक संदेश राऊत, तसेच मार्गदर्शक शिक्षक दीपनंदा बोधे आणि जीवन गुहागरकर यांनी शाल्मलीचे मनःपूर्वक अभिनंदन केले आहे.
तिच्या यशाचे श्रेय तिच्या मेहनतीबरोबरच शालेय प्रशिक्षण आणि मार्गदर्शनाला देण्यात आले आहे. संस्थेने तिच्या पुढील प्रवासासाठी शुभेच्छा दिल्या असून, जिल्हास्तरीय स्पर्धेतही ती यशस्वी होईल, असा विश्वास व्यक्त केला आहे.
शाल्मलीच्या या यशाने तालुक्यातील इतर विद्यार्थ्यांसाठी प्रेरणा निर्माण झाली आहे. बुद्धिबळासारख्या बौद्धिक खेळातून विद्यार्थ्यांचा सर्वांगीण विकास साधला जातो, असे मत शालेय समितीने व्यक्त केले आहे. शाल्मली आता जिल्हास्तरीय स्पर्धेत दापोली तालुक्याचे नाव उंचावण्यासाठी सज्ज आहे.