चिपळूण : रत्नागिरी जिल्ह्यातील प्रतिष्ठित नेते प्रशांत यादव लवकरच भारतीय जनता पक्षात (भाजप) प्रवेश करणार आहेत.
त्यांच्या पक्षप्रवेशाची औपचारिक घोषणा राज्याचे मत्स्य विभाग मंत्री आणि रत्नागिरी जिल्ह्याचे संपर्क मंत्री नितेश राणे यांनी चिपळूण येथील वाशिष्ठी डेअरीमध्ये आयोजित पत्रकार परिषदेत केली.
नितेश राणे म्हणाले,
प्रशांत यादव हे रत्नागिरी जिल्ह्यातील मोठे नेते आहेत. आम्ही त्यांच्याकडे केवळ कार्यकर्ता म्हणून नाही, तर प्रभावी नेतृत्व म्हणून पाहतो. वाशिष्ठी डेअरीच्या माध्यमातून त्यांनी अनेकांना रोजगार उपलब्ध करून दिला आहे. सहकार क्षेत्रातही त्यांचे योगदान मोलाचे आहे. त्यांच्या पक्षप्रवेशामुळे भाजपला निश्चितच बळ मिळेल.
प्रशांत यादव यांचा भाजपमधील प्रवेश १९ ऑगस्ट २०२५ रोजी मुंबईतील नरिमन पॉइंट येथील भाजप प्रदेश कार्यालयात होणार आहे. या सोहळ्यासाठी मुख्यमंत्री देवेंद्र फडणवीस, प्रदेशाध्यक्ष रवींद्र चव्हाण, खासदार नारायण राणे यांच्यासह पक्षाचे वरिष्ठ नेते उपस्थित राहणार आहेत.
पत्रकार परिषदेत बोलताना नितेश राणे यांनी सांगितले, “पालकमंत्री उदय सामंत हे आमच्या मतदारसंघातील ज्येष्ठ नेते आहेत. प्रत्येकाला आपला पक्ष वाढवण्याचा अधिकार आहे. प्रशांत यादव यांनी योग्य विचार करून भाजपमध्ये प्रवेशाचा निर्णय घेतला आहे. त्यांच्या प्रवेशामुळे पक्षाची संघटना अधिक मजबूत होईल. त्यांचे कार्यकर्त्यांचे जाळे तळागाळापर्यंत पसरलेले आहे.”
महायुतीतील आमदार शेखर निकम यांच्याबाबत विचारले असता, राणे म्हणाले, “प्रत्येकाला पक्ष वाढवण्याचा अधिकार आहे. स्वबळावर लढलो, तरच पक्षाची ताकद वाढेल.”
या पत्रकार परिषदेला माजी आमदार डॉ. विनय नातू, जिल्हाध्यक्ष सतीश मोरे, राजेश सावंत, चिपळूण नागरी सहकारी पतसंस्थेच्या मुख्य कार्यकारी अधिकारी स्वप्ना यादव यांच्यासह अनेक नेते आणि कार्यकर्ते उपस्थित होते.
नितेश राणे यांनी यावेळी २०२४च्या विधानसभा निवडणुकीत प्रशांत यादव केवळ ६,८०० मतांनी पराभूत झाल्याचे नमूद करत, २०२९च्या विधानसभा निवडणुकीत भाजप निश्चितच विजयी होईल, असा विश्वास व्यक्त केला.
प्रशांत यादव यांच्या पक्षप्रवेशामुळे रत्नागिरीतील भाजप कार्यकर्त्यांमध्ये उत्साहाचे वातावरण निर्माण झाले आहे. १९ ऑगस्टच्या प्रवेश सोहळ्यासाठी मोठ्या संख्येने कार्यकर्ते आणि नेते उपस्थित राहण्याची अपेक्षा आहे.