दापोली : दापोली पोलिस ठाण्याचे नवनिर्वाचित पोलिस निरीक्षक महेश तोरसकर यांचे माजी सैनिकांनी उत्साहपूर्ण स्वागत केले.
स्थानिक माजी सैनिक संघटनेने दापोली पोलीस स्टेशनमध्ये जाऊन निरीक्षक तोरसकर यांच्याशी संवाद साधला आणि दापोलीतील कायदा व सुव्यवस्था राखण्यासाठी पूर्ण सहकार्य करण्याचे आश्वासन दिले.
यावेळी माजी सैनिक संघटनेचे सुरेश जाधव, संदीप यादव, विजय पाटणे, राजेंद्र कदम, सुदेश चिपळूणकर, आत्माराम महाडिक, संजीवन साळवी, सुनील ईदाते, प्रताप पाटणे आदी उपस्थित होते.
माजी सैनिकांनी आपल्या अनुभवाचा आणि कौशल्याचा उपयोग करून स्थानिक पोलिसांना सहकार्य करण्याची तयारी दर्शवली. विशेषतः, गावातील सामाजिक सलोखा, गुन्हेगारी नियंत्रण आणि तरुणांमधील जागरूकता वाढवण्यासाठी एकत्रितपणे काम करण्याची इच्छा त्यांनी व्यक्त केली.
पोलिस निरीक्षक महेश तोरसकर यांनी यावेळी माजी सैनिकांचे आभार मानले आणि त्यांच्या सहकार्याची प्रशंसा केली.
हा स्वागत समारंभ दापोलीतील सामुदायिक एकतेचे आणि पोलिस-नागरिक सहकार्याचे एक उत्तम उदाहरण ठरला. माजी सैनिक आणि पोलिस प्रशासन यांच्यातील हा संवाद स्थानिक पातळीवर सकारात्मक बदल घडवून आणण्यास मदत करेल.