रत्नागिरी : उपमुख्यमंत्री अजित पवार सोमवार, दिनांक 17 मार्च 2025 रोजी रत्नागिरी जिल्ह्याचा दौरा करतील. या दौऱ्यात ते विविध विकासकामांचा शुभारंभ, पाहणी आणि लोकार्पण करतील.
दुपारी 3 वाजता मुंबईहून रत्नागिरीसाठी हेलिकॉप्टरने प्रयाण केल्यानंतर, उपमुख्यमंत्री अजित पवार शासकीय विश्रामगृहात येतील आणि थोडा वेळ राखीव ठेवतील.
कौशल्य वर्धन केंद्र आणि मुख्य कार्यक्रम:
दुपारी चार वाजता उपमुख्यमंत्री अजित पवार एमआयडीसीतील टाटा टेक्नॉलॉजी संचालित कौशल्य वर्धन केंद्राच्या (Centre for Invention, Innovation, Incubation and Training Centre) भूमिपूजन कार्यक्रमाला हजेरी लावतील.
या केंद्राच्या माध्यमातून रत्नागिरीतील तरुणांना रोजगाराच्या नवीन संधी उपलब्ध होतील, असा विश्वास ते व्यक्त करतील.
यानंतर, उद्यमनगरमधील नाईक हॉलमध्ये आयोजित मुख्य कार्यक्रमात ते नागरिकांशी संवाद साधतील आणि त्यांच्या समस्या जाणून घेतील.
सहकारी बँकेला भेट आणि तारांगणाची पाहणी:
या कार्यक्रमानंतर 5.15 वाजता उपमुख्यमंत्री अजित पवार रत्नागिरी जिल्हा मध्यवर्ती सहकारी बँकेला सदिच्छा भेट देतील. बँकेचे अध्यक्ष तानाजी चोरगे त्यांचे स्वागत करतील. यावेळी ते बँकेच्या कामकाजाची माहिती घेतील.
संध्याकाळी 6 वाजता ते श्रीमान हिंदूहृदयसम्राट बाळासाहेब ठाकरे तारांगणातील विविध विकासकामांची पाहणी करतील. रत्नागिरी नगरपरिषदेचे प्रशासक तथा मुख्याधिकारी तुषार बाबर त्यांना प्रकल्पाची माहिती देतील.
शिवसृष्टीचे लोकार्पण:
रत्नदुर्ग किल्ल्यावर संध्याकाळी ७.३० वाजता वैशिष्ट्यपूर्ण योजनेअंतर्गत शिवसृष्टी निर्माण (भाग-१) या विकासकामाचा लोकार्पण सोहळा अजित पवार यांच्या हस्ते पार पडेल.
या प्रकल्पाच्या माध्यमातून छत्रपती शिवाजी महाराजांच्या जीवनातील महत्त्वाचे प्रसंग आणि किल्ल्यांचा इतिहास दृकश्राव्य माध्यमातून सादर करण्यात येईल.
थिबा पॅलेस येथे थ्रीडी मॅपिंग शो:
रात्री ८.१५ वाजता उपमुख्यमंत्री अजित पवार थिबा पॅलेसला भेट देतील. येथे वैशिष्ट्यपूर्ण योजनेअंतर्गत थ्रीडी मॅपिंग मल्टिमिडिया शो (खुले नाट्यगृह) या विकासकामाचा लोकार्पण सोहळा त्यांच्या हस्ते पार पडेल.
या शोच्या माध्यमातून थिबा पॅलेसचा इतिहास आणि रत्नागिरी शहराची माहिती मनोरंजक पद्धतीने सादर करण्यात येईल.