रत्नागिरी : शहरातील मिरकरवाडा जेटी परिसरात ३ रुपयांच्या पिशवीच्या खरेदीवरून दोन गटांमध्ये जोरदार हाणामारी झाली. किरकोळ वादाचे रूपांतर हिंसक झटापटीत झाले असून, दोन्ही गटांना दुखापती झाल्या आहेत. या घटनेनंतर दोन्ही बाजूंनी एकमेकांविरुद्ध पोलिसांत तक्रारी दाखल केल्या आहेत. हाणामारीनंतर जिल्हा रुग्णालयात मोठी गर्दी जमली होती.
मिळालेल्या माहितीनुसार, एका ग्राहकाने जेटीवरील विक्रेत्याकडून ३ रुपयांची पिशवी खरेदी केली. सुट्टे पैसे नसल्याने ग्राहकाने गुगल पे ने पैसे देण्याची तयारी दर्शवली आणि क्यूआर कोड मागितला. मात्र, विक्रेत्याने उद्धटपणे उत्तर दिल्याने दोघांमध्ये शाब्दिक बाचाबाची झाली. हा वाद काही क्षणांतच वाढला आणि दोन्ही गटांच्या समर्थकांमध्ये हाणामारी सुरू झाली.
ग्राहक आणि त्याच्या साथीदारांच्या म्हणण्यानुसार, ३० ते ४० जणांच्या जमावाने त्यांच्यावर हल्ला करून मारहाण केली. दुसरीकडे, पिशवी विक्रेत्याने ग्राहक आणि त्याच्या गटाकडून मारहाण झाल्याचा दावा केला आहे. दोन्ही गटांना दुखापती झाल्या असून, त्यांच्यावर जिल्हा रुग्णालयात उपचार सुरू आहेत. ग्राहक गट थेट रुग्णालयात गेला, तर विक्रेत्याने आधी पोलीस ठाण्यात तक्रार दाखल करून नंतर रुग्णालयात प्रवेश घेतला.
रुग्णालयात दोन्ही गटांचे समर्थक मोठ्या संख्येने जमल्याने तणावाचे वातावरण निर्माण झाले. परिस्थिती नियंत्रणात ठेवण्यासाठी पोलिसांनी तातडीने बंदोबस्त वाढवला. शहर पोलीस निरीक्षक शिवरकर यांनी रुग्णालयाला भेट देऊन आढावा घेतला आणि जमावाला शांत राहण्याचे आवाहन केले. “तक्रार असेल तर पोलीस ठाण्यात जा,” असा सल्ला देत त्यांनी परिस्थिती हळूहळू नियंत्रणात आणली.
या प्रकरणात दोन्ही गटांनी परस्परविरोधी तक्रारी नोंदवल्या आहेत. पोलिसांनी तक्रारी दाखल करून तपास सुरू केला असून, प्रत्यक्षदर्शींची माहिती आणि पुराव्यांच्या आधारे पुढील कारवाई होणार आहे. निरीक्षक शिवरकर यांनी नागरिकांना संयम राखण्याचे आणि अफवांवर विश्वास न ठेवण्याचे आवाहन केले आहे.
