रत्नागिरी : जिल्ह्यात पावसाने अखेर आपली दमदार एन्ट्री केली असून, संपूर्ण जिल्ह्याला पावसाने चांगलेच झोडपून काढले आहे.
दिनांक २३ जून २०२६ रोजी प्राप्त झालेल्या अधिकृत पर्जन्यमानाच्या आकडेवारीनुसार, जिल्ह्यात एकाच दिवसात एकूण ४१९.९५ मिलीमीटर पावसाची नोंद झाली आहे.
तर आजचे सरासरी पर्जन्यमान ४६.६६ मिलीमीटर इतके राहिले आहे. पावसाच्या या जोरदार आगमनामुळे उष्णतेने हैराण झालेल्या नागरिकांना मोठा दिलासा मिळाला असून, मान्सूनच्या या दमदार आगमनाने बळीराजादेखील सुखावला आहे. आता जिल्ह्यातील रखडलेल्या शेतीच्या कामांना मोठा वेग येण्याची शक्यता निर्माण झाली आहे.
जिल्ह्यातील विविध तालुक्यांमध्ये पावसाने कमी-अधिक प्रमाणात जोरदार हजेरी लावली आहे. यामध्ये रत्नागिरी तालुक्यात सर्वाधिक म्हणजे तब्बल ९१ मिलीमीटर पावसाची नोंद झाली आहे.
त्याखालोखाल गुहागर तालुक्यालाही पावसाने झोडपले असून तिथे ७६ मिलीमीटर पाऊस बरसला आहे. इतर तालुक्यांच्या पर्जन्यमानाचा आढावा घेतल्यास राजापूरमध्ये ४६.६३ मिलीमीटर, दापोलीत ४५ मिलीमीटर आणि खेडमध्ये ४१.७१ मिलीमीटर पावसाची नोंद झाली आहे.
तसेच संगमेश्वर तालुक्यात ३१.०८ मिलीमीटर, चिपळूणमध्ये ३०.८८ मिलीमीटर आणि लांजामध्ये २९.४० मिलीमीटर पाऊस पडला आहे. सर्वात कमी पाऊस मंडणगड तालुक्यात पडला असून तिथे २८.२५ मिलीमीटर पर्जन्यमानाची नोंद झाली आहे.
पावसाचा हा जोर असाच कायम राहिल्यास जिल्ह्यातील धरणांच्या आणि नद्यांच्या पाणीसाठ्यात झपाट्याने वाढ होण्याची अपेक्षा व्यक्त केली जात आहे.