​पैसे भरूनही पुरवठा मिळेना; दापोली तालुका पेट्रोल असोसिएशन आक्रमक

दापोली : दापोली तालुका पेट्रोल डिझेल असोसिएशनने तालुक्यातील इंधन तुटवड्याबाबत अत्यंत आक्रमक पवित्रा घेतला असून प्रशासनाला दिलेल्या पत्रात तेल कंपन्यांच्या कार्यपद्धतीवर तीव्र नाराजी व्यक्त केली आहे.

जी.बी. मेहता अँड सन्स, राजलक्ष्मी ऑटोमोबाईल आणि श्रद्धा ऑटोमोबाईल यांसारख्या प्रमुख वितरकांनी निदर्शनास आणून दिले आहे की, बीपीसीएल, एचपीसीएल आणि आयओसी या कंपन्यांकडे आगाऊ रक्कम भरूनही इंधनाचा पुरवठा वेळेवर केला जात नाही.

हा तांत्रिक अडथळा नसून कंपन्यांच्या नियोजनाचा अभाव असल्याचे असोसिएशनचे म्हणणे आहे, ज्यामुळे स्थानिक पंप मालकांना आर्थिक भुर्दंड सोसावा लागत आहे आणि ग्राहकांच्या रोषाला सामोरे जावे लागत आहे.

या पत्राचा मुख्य रोख दापोलीच्या भौगोलिक आणि हंगामी वैशिष्ट्यांवर आहे. दापोली हे एक महत्त्वाचे पर्यटन केंद्र असल्याने सध्याच्या सुट्ट्यांच्या काळात पर्यटकांच्या वाहनांचा ओघ प्रचंड वाढला आहे.

त्याचप्रमाणे, सध्या हापूस आंब्याचा काढणीचा हंगाम ऐन भरात असून, बागायतदारांना बागेतील माल बाजारपेठेपर्यंत पोहोचवण्यासाठी डिझेलची नितांत गरज आहे.

इंधन वेळेवर मिळाले नाही तर हा नाशवंत माल सडून शेतकऱ्यांचे मोठे नुकसान होण्याची भीती असोसिएशनने व्यक्त केली आहे. पर्यटनातून मिळणारा महसूल आणि शेतकऱ्यांचे हित जपण्यासाठी हा पुरवठा युद्धपातळीवर सुरळीत होणे आवश्यक आहे.

असोसिएशनने तहसीलदार प्रशासनाला विनंती केली आहे की, या प्रकरणात तात्काळ हस्तक्षेप करून संबंधित तेल कंपन्यांना इंधन पुरवठा नियमित करण्याचे कडक निर्देश देण्यात यावेत.

जर हा पुरवठा सुरळीत झाला नाही, तर तालुक्यातील वाहतूक व्यवस्था कोलमडून पडण्याची शक्यता आहे.

या पत्रावर तालुक्यातील अनेक पेट्रोल पंप मालकांनी स्वाक्षरी करून प्रशासनाचे लक्ष वेधले आहे.