‘माय कोकण’चा दिवाळी अंक अत्यंत अभ्यासपूर्ण आणि दर्जेदार; उदय सामंत यांच्याकडून भरभरून कौतुक

रत्नागिरीतील पत्रकार आणि ‘माय कोकण’चे संपादक मुश्ताक खान यांनी त्यांच्या साप्ताहिकाचा वर्धापन दिन विशेषांक तसेच दिवाळी अंक २०२६ राज्याचे मंत्री उदय सामंत यांना नुकताच भेट दिला.

या अंकाची उत्कृष्ट निर्मिती आणि दर्जेदार आशय पाहून उदय सामंत यांनी ‘माय कोकण’च्या या विशेष अंकाचे विशेष कौतुक केले.

हा अंक भेट देताना शिवसेना जिल्हाप्रमुख राहुल पंडित, ज्येष्ठ नगरसेवक राजन शेट्ये, राजीव कीर, जिल्हा परिषदेचे समाज कल्याण सभापती सुयोग कांबळे, माजी नगरसेवक मुसा काझी, पत्रकार पवन जाधव आदी उपस्थित होते.

‘माय कोकण’च्या या विशेषांकाविषयी मत व्यक्त करताना उदय सामंत यांनी अंकातील माहितीवर आणि सादरीकरणावर विशेष भर दिला.

हा दिवाळी अंक अतिशय उत्कृष्टपणे साकारण्यात आला असून त्यामध्ये अत्यंत दर्जेदार आणि वाचनीय लेखांचा समावेश करण्यात आल्याचे त्यांनी आवर्जून सांगितले.

विशेषतः या अंकामध्ये रत्नागिरी जिल्ह्यातील वाढत्या औद्योगिक प्रगतीचा जो सविस्तर आढावा घेण्यात आला आहे, तो अत्यंत अभ्यासपूर्ण आणि समाजासाठी उल्लेखनीय असल्याचे निरीक्षण त्यांनी नोंदवले.

यासोबतच अंकात समाविष्ट करण्यात आलेल्या विविध मान्यवरांच्या कविता अत्यंत हृदयस्पर्शी असून त्या अंकाची साहित्यिक उंची अधिक वाढवतात.

अशा अतिशय माहितीपूर्ण, सुंदर आणि सर्वसमावेशक अंकाची निर्मिती केल्याबद्दल उदय सामंत यांनी संपादक मुश्ताक खान आणि त्यांच्या संपूर्ण टीमचे अभिनंदन करून त्यांना पुढील यशस्वी वाटचालीसाठी शुभेच्छा दिल्या.