चिपळूणच्या पर्यटनात, सौंदयात भर घालणारी फोटो गॅलरी – आमदार शेखर निकम

वनविभागाच्या फोटो गॅलरी कम कॉन्फरन्स हॉलचे उदघाटन

रत्नागिरी : कोकणच्या निसर्गरम्य परिसरात सह्याद्रीच्या कुशीत आणि समुद्रकिनाऱ्याच्या सान्निध्यात वसलेल्या चिपळूण येथे वनविभागाच्या फोटो गॅलरी कम कॉन्फरन्स हॉलचे उद्घाटन आमदार शेखर निकम यांच्या अध्यक्षतेखाली आणि सह्याद्री निसर्ग मित्रचे अध्यक्ष विश्वास उर्फ भाऊ काटदरे यांच्या हस्ते काल झाले. या फोटो गॅलरीमुळे चिपळूणच्या पर्यटनात आणि सौंदर्यात निश्चितच भर पडेल, असे गौरवोद्गार आमदार निकम यांनी काढले.

जिल्हा नियोजन योजना 2024-25 अंतर्गत चिपळूण येथील वनविभागाच्या कार्यालयात ही फोटो गॅलरी आणि कॉन्फरन्स हॉल उभारण्यात आले आहे. उद्घाटन समारंभाला प्रांताधिकारी आकाश लिगाडे, विभागीय वन अधिकारी गिरीजा देसाई, मुख्याधिकारी विशाल भोसले, सहाय्यक वनसंरक्षक प्रियंका लगड, उपविभागीय कृषी अधिकारी शिवाजी शिंदे, अर्थ फाऊंडेशनचे अध्यक्ष शहानवाज शहा यांच्यासह पर्यावरणप्रेमी, वनविभागाचे अधिकारी, कर्मचारी आणि नागरिक मोठ्या संख्येने उपस्थित होते.

आमदार शेखर निकम यांनी सांगितले की, या फोटो गॅलरीत प्राणी, पक्षी आणि देशी झाडांबाबत माहिती उपलब्ध करून देण्यात यावी, जेणेकरून नव्या पिढीला निसर्गाबाबत जागरूकता निर्माण होईल. ते म्हणाले, “केवळ झाडे लावणे पुरेसे नाही, त्यांचे संगोपनही तितकेच महत्त्वाचे आहे. देशी झाडांच्या लागवडीवर भर द्यावा आणि बांबू नर्सरीसारख्या उपक्रमांना प्रोत्साहन द्यावे.” त्य svelी त्यांनी सुचवले की, महिन्यातून एकदा निसर्गाशी संबंधित व्याख्यानमालिका आयोजित केल्यास आणि तालुक्यातील सरपंचांना वनविभागाच्या योजनांची माहिती दिल्यास स्थानिक पातळीवर जंगल संवर्धनाला चालना मिळेल.

ते पुढे म्हणाले की, कोकणात ताडोब्याप्रमाणे समृद्ध निसर्गसंपदा आहे. येथील प्राणी आणि पक्ष्यांचे दर्शन पर्यटकांना आकर्षित करू शकते. त्यासाठी योग्य प्रसिद्धी आणि प्राणी गणनेचे उपक्रम राबवावेत, जेणेकरून पर्यटनाला चालना मिळेल.

प्रांताधिकारी आकाश लिगाडे यांनी कोकणच्या पर्यटन संभावनांवर प्रकाश टाकला आणि विदर्भाप्रमाणे बुद्ध पौर्णिमेला प्राणी गणना करण्याचे सुचवले. यामुळे येथील प्राणी आणि पक्ष्यांचा अचूक आकडा मिळेल आणि पर्यटनाला प्रोत्साहन मिळेल.

सह्याद्री निसर्ग मित्रचे अध्यक्ष भाऊ काटदरे आणि अर्थ फाऊंडेशनचे शहानवाज शहा यांनीही आपली मते व्यक्त केली. विभागीय वन अधिकारी गिरीजा देसाई यांनी प्रास्ताविकात फोटो गॅलरी आणि कॉन्फरन्स हॉलच्या उद्देशाबाबत माहिती दिली. कार्यक्रमाचे सूत्रसंचालन अमोल टाकळे यांनी केले, तर प्रियंका लगड यांनी आभार प्रदर्शन केले.

प्रमुख उपस्थिती: शौकत मुकादम, बापू काणे, बाळशेठ जाधव, रामशेठ रेडीज, रसिका देवळेकर यांच्यासह स्थानिक पर्यावरणप्रेमी आणि नागरिक.

चिपळूणच्या पर्यटनाला नवी दिशा देणारा हा उपक्रम निसर्ग संवर्धन आणि स्थानिक अर्थव्यवस्थेला चालना देण्यासाठी महत्त्वाचा ठरेल, अशी अपेक्षा आहे.