लोटे येथील लक्ष्मी ऑर्गॅनिक प्रकल्प पर्यावरणपूरक आणि सुरक्षित; कंपनीने मांडली स्पष्ट भूमिका

रत्नागिरी (विशेष प्रतिनिधी) : लोटे परशुराम एमआयडीसीमधील लक्ष्मी ऑर्गॅनिक इंडस्ट्रीज लिमिटेड (LOIL) या प्रकल्पाबाबत सध्या सुरू असलेल्या चर्चांच्या पार्श्वभूमीवर कंपनीने आपली अधिकृत भूमिका स्पष्ट केली आहे.

हा प्रकल्प सर्व पर्यावरणीय, सुरक्षा आणि नियामक नियमांचे काटेकोरपणे पालन करत असून पूर्णतः सुरक्षित असल्याचा दावा कंपनीच्या वरिष्ठ अधिकाऱ्यांनी शुक्रवारी आयोजित पत्रकार परिषदेत केला.

https://youtu.be/203s6k0esnU?si=vhMznzudwNtT2c0E

प्रगत तंत्रज्ञानाचा वापर आणि शून्य उत्सर्जन
उत्पादन विभागाचे वरिष्ठ उपाध्यक्ष दीपक पाटील यांनी प्रकल्पाच्या कार्यक्षमतेवर प्रकाश टाकला. ते म्हणाले की, “प्रकल्प स्थापनेपासूनच सर्व वैधानिक परवानग्या घेऊन कार्यरत आहे. आम्ही ‘क्लोज्ड-लूप’ (Closed-loop) या अत्याधुनिक प्रणालीचा वापर करतो, ज्यामुळे हानिकारक घटक वातावरणात विसर्जित होण्याची शक्यता राहत नाही. सांडपाण्यावर प्रक्रिया करण्यासाठी आमच्याकडे उच्च क्षमतेची स्वतंत्र यंत्रणा असून, प्रक्रिया केलेले पाणी आणि कचरा केवळ शासनमान्य केंद्रांकडेच विल्हेवाटीसाठी पाठवला जातो.”

डिजिटल पारदर्शकता आणि सुरक्षा
कंपनीने सुरक्षेच्या बाबतीत कोणतीही तडजोड केली नसल्याचे स्पष्ट केले आहे. कचरा व्यवस्थापनात पारदर्शकता आणण्यासाठी डिजिटल ट्रेसेबिलिटी प्रणाली कार्यान्वित करण्यात आली आहे. प्रकल्पाचे फ्लोअरिंग आणि सांडपाणी प्रक्रिया केंद्रांचे बांधकाम जागतिक मानकांनुसार करण्यात आले आहे, जेणेकरून गळतीचा धोका उरणार नाही, असेही त्यांनी सांगितलं आहे.

देशाच्या अर्थव्यवस्थेत महत्त्वपूर्ण योगदान
या प्रकल्पात तयार होणारी फ्ल्युरिनयुक्त उत्पादने आधुनिक जगासाठी कणा मानली जातात. यामध्ये प्रामुख्याने:

• सेमीकंडक्टर आणि संरक्षण क्षेत्र
• इलेक्ट्रिक वाहने (EV)
• वैद्यकीय उपकरणे आणि औषधनिर्मिती
  यांसारख्या महत्त्वपूर्ण क्षेत्रांना आवश्यक असणारा कच्चा माल या प्रकल्पातून पुरवला जातो. जागतिक स्तरावर फ्ल्युरिन रसायनशास्त्रासाठी असलेले कडक नियम लक्ष्मी ऑर्गॅनिक पाळत असल्याचे अधिकाऱ्यांनी सांगितले.

“पर्यावरणाचे रक्षण करत देशाच्या विकासाला हातभार लावणे हेच आमचे उद्दिष्ट आहे. आम्ही नियामक संस्था आणि स्थानिक नागरिकांशी संवाद साधून पारदर्शक कारभारासाठी कटिबद्ध आहोत.”
— दीपक पाटील, वरिष्ठ उपाध्यक्ष (उत्पादन)

या पत्रकार परिषदेला उत्पादन विभागाचे अध्यक्ष राजेश नाईक आणि पर्यावरण, आरोग्य व सुरक्षा विभागाचे कार्यकारी उपाध्यक्ष उदय वैशंपायन यांचीही प्रमुख उपस्थिती होती.