कर्ला-आंबेशेत गणेश आगमन मिरवणूक ढोल-ताशांच्या गजरात उत्साहात संपन्न

रत्नागिरी (वार्ताहर): गणपती बाप्पा मोरया… मंगलमूर्ती मोरयाच्या जयघोषात, ढोल-ताशांच्या गजरात, फुलांची उधळण करीत कर्ला-आंबेशेत येथील गणेश आगमन मिरवणुकीने सर्वांचे लक्ष वेधून घेतले. शांततेत आणि उत्साही वातावरणात ही मिरवणूक पार पडली.

मागील 39 वर्षांपासून कर्ला-आंबेशेत गावातील घरगुती गणरायांची मिरवणूक वाजत-गाजत शहरातून गावापर्यंत काढण्यात येते. यंदा 40 वे वर्ष असून, ही मिरवणूक अत्यंत शिस्तबद्ध पद्धतीने आणि शांततेत निघाली. विशेष म्हणजे, मोहल्ल्यातून जाणाऱ्या या मिरवणुकीला विशेष महत्त्व आहे. यावर्षी मिरवणुकीत जवळपास 120 गणेशमूर्ती सहभागी झाल्या होत्या. ढोल-ताशा पथक, झांज पथक, महिला लेझिम पथक, बँड पथक आणि शिवशक्ती चक्री भजन यांनी सर्वांचे लक्ष वेधले.

सकाळी 9:30 वाजता श्रीफळ वाढवून मिरवणुकीला सुरुवात झाली. सुमारे चार ते पाच तास चाललेली ही मिरवणूक स्वा. सावरकर चौकातून सुरू होऊन गोखले नाका, रामनाका, एसटी स्टँड, जयस्तंभ, शासकीय रुग्णालय मार्गे निवखोल, कर्ला आणि आंबेशेत अशी काढण्यात आली.

श्री मंगलमूर्ती प्रतिष्ठानच्या सदस्यांनी गणेशभक्तांना शुभेच्छा देण्यासाठी आणि पुष्पवृष्टीसाठी उपस्थिती लावली होती. मिरवणुकीदरम्यान मोठा पोलीस बंदोबस्त तैनात करण्यात आला होता.