रत्नागिरी : मत्स्य व्यवसाय आणि बंदरे मंत्री नितेश राणे यांच्या कठोर निर्देशानंतर, मत्स्य व्यवसाय विभागाने अनधिकृत मासेमारी करणाऱ्यांवर जोरदार कारवाई सुरू केली आहे.
काल रात्री जयगड येथे अनधिकृत एल.ई.डी. मासेमारी करणाऱ्या नौकेवर कारवाई करण्यात आली. या कारवाईत तीन तांडेलांना ताब्यात घेऊन, सुमारे तीन ते चार लाख रुपयांची एल.ई.डी. दिवे, जनरेटर आणि इतर उपकरणे जप्त करण्यात आली.
मत्स्य व्यवसाय विभागाचे अंमलबजावणी अधिकारी स्मिता कांबळे, सहाय्यक मत्स्य व्यवसाय विकास अधिकारी (परवाना अधिकारी, जयगड) स्वप्नील चव्हाण आणि (परवाना अधिकारी, गुहागर) हे अधिकारी दि. ७ मार्च २०२५ रोजी रात्री जयगड समोर नियमित गस्त घालत असताना, त्यांना १७°२०.१०.५ उत्तर आणि ७२°५९.०२.४ पूर्व या ठिकाणी एक संशयास्पद नौका दिसली. ‘अल-हज-हसन’ (नोंदणी क्रमांक: IND-MH-4-MM-5701) असे या नौकेचे नाव असून, ती मोहम्मद हनिफ हसनमिया तांडेल (रा. मिरकरवाडा, रत्नागिरी) यांच्या मालकीची आहे.
ही नौका महाराष्ट्राच्या जल क्षेत्रात अनधिकृतपणे एल.ई.डी. दिव्यांच्या मदतीने मासेमारी करत असल्याचे अधिकाऱ्यांच्या निदर्शनास आले.
या नौकेवर तांडेल आणि तीन खलाशी होते. नौका जप्त करून जयगड बंदरात आणण्यात आली आहे. नौकेवर मासे आढळले नाहीत, पण एल.ई.डी. दिवे आणि इतर उपकरणे जप्त करण्यात आली आहेत.
या कारवाईत स्मिता कांबळे, स्वप्नील चव्हाण यांच्यासोबत सागरी सुरक्षा पर्यवेक्षक सुजन पवार (जयगड) आणि विनायक शिंदे (गुहागर) यांनी सहकार्य केले.
या नौकेवरील दोषींविरुद्ध सहाय्यक आयुक्त मत्स्य व्यवसाय, रत्नागिरी यांच्या न्यायालयात खटला चालवला जाईल, अशी माहिती मिळाली आहे.