दापोली : दापोलीतील क्षितीज कलामंचने आयोजित केलेला ‘एक शाम बलवंत के नाम’ हा कार्यक्रम दापोलीकरांच्या हृदयात बलवंत फाटक यांच्या आठवणींना उजाळा देणारा ठरला. पद्मश्रद्धा हॉलमध्ये झालेल्या या कार्यक्रमाला दापोलीकरांनी उत्स्फूर्त प्रतिसाद दिला.
बलवंत फाटक हे एक कुशल साऊंड ऑपरेटर आणि संगीत व काव्यप्रेमी व्यक्तिमत्त्व होते. त्यांच्या आठवणींना समर्पित या कार्यक्रमात दापोलीतील अनेक मान्यवरांनी त्यांच्यासोबतच्या आठवणींना उजाळा दिला.
कार्यक्रमाच्या सुरुवातीला क्षितीज कलामंचचे सुनील कदम यांनी बलवंत फाटक यांच्या कार्याबद्दल माहिती दिली. दापोलीतील अनेक मान्यवर व्यक्तींनी बलवंत फाटक यांच्यासोबतच्या त्यांच्या आठवणी, अनुभव आणि त्यांच्या कार्याबद्दल विचार व्यक्त केले.
त्यांच्या मित्र-परिवार, सहकारी आणि जवळच्या लोकांनी त्यांच्या संगीत आणि कवितेच्या आवडीबद्दल, त्यांच्या कामातील किस्से, आणि त्यांच्या प्रेमळ स्वभावाबद्दल आपले अनुभव सांगितले.
कार्यक्रमात सहभागी झालेल्यांनी सांगितलेल्या आठवणींनी बलवंत फाटक यांच्या कार्याला आणि त्यांच्या प्रेमळ स्वभावाला उजाळा मिळाला.
कैलास गांधी यांनी त्यांच्या ‘छंदी फंदी’ कविता सादर केली. कवी किशोर कदम (सौमित्र)च्या आवाजात रेकॉर्ड झालेली बलवंत फाटक यांच्यावर लिहिलेली कविता ‘तुझ्या नव्या घरावरून जाताना’ आणि ‘बल्या, मी हल्ली तुला समांतर होत चाललोय’ या कविता सुनील कदम यांनी सादर केल्या.
तसेच, प्रफ्फुल अहिरे यांनी ‘आ बैठ सामने दर्द पिने दे बल्या’ हे सुनील कदम लिखित गाणे सादर केले. यामुळे उपस्थितांच्या भावनांना वाट मोकळी झाली आणि बलवंत फाटक यांच्या आठवणींनी पुन्हा एकदा हृदय भरून आले.
या कार्यक्रमांमध्ये संदेश राऊत, सुदेश मालवणकर, अशोक निर्बाण, प्रशांत कांबळे, विनय मुसळे, राहुल मंडलीक, कैलास गांधी, रमेश मांगले, प्रफ्फुल अहीरे, शर्मिला फाटक आणि दिगंबर पावसे यांनी बलवंत फाटक यांच्या आठवणी सांगितल्या.
Aया कार्यक्रमाचे प्रायोजक अनमोल डेकोचे मनोज गावडे यांच्या सहकार्यामुळे कार्यक्रमाला विशेष रंगत आली.
कार्यक्रमाच्या यशस्वी आयोजनासाठी क्षितीज कलामंचचे अध्यक्ष अभिजित भोंगले, उपाध्यक्ष उमाकांत देवघरे, प्रसाद गुजर, महेंद्र बांद्रे, वैभव सागवेकर, इब्राहिम हसबनीस, दिगंबर पावसे, पप्पू कांबळे यांनी विशेष परिश्रम घेतले.
या कार्यक्रमास दापोलीकरांनी उत्स्फूर्तपणे प्रतिसाद देत बलवंत फाटक यांना आदरांजली वाहिली.