गुहागर : तालुक्यातील एका मराठी शाळेत दुसरीच्या वर्गात शिकणाऱ्या चिमुकलीवर वारंवार लैंगिक अत्याचार केल्याचा संतापजनक प्रकार उघडकीस आल्यानंतर, या प्रकरणी चिपळूण येथील विशेष न्यायालयाने आरोपी शिक्षकाला जन्मठेपेची कठोर शिक्षा सुनावली आहे.
उदय नामदेव वेल्हाळ असे या नराधम शिक्षकाचे नाव असून न्यायालयाने त्याला जन्मठेपेसोबतच दंडाचीही शिक्षा ठोठावली आहे. विशेष न्यायालयाचे न्यायाधीश डी. बी. म्हालटकर यांनी हा महत्त्वपूर्ण निकाल दिला.
बालकावरील लैंगिक अत्याचाराच्या या अत्यंत गंभीर आणि संवेदनशील प्रकरणात न्यायालयाने दिलेल्या कठोर शिक्षेमुळे शिक्षण क्षेत्रातून समाधान व्यक्त केले जात आहे.
मार्च २०२० मध्ये ही धक्कादायक घटना घडली होती. पीडित चिमुकलीला आरोपी उदय वेल्हाळ हाच शिक्षक शाळेत शिकवत होता.
७ मार्च २०२० रोजी ही मुलगी शाळेतून घरी परतली, तेव्हा ती लंगडत चालत असल्याचे तिच्या आईच्या निदर्शनास आले.
मुलीच्या चालण्यातला हा असामान्य बदल पाहून आईने तिला विश्वासात घेऊन विचारपूस केली. त्यावेळी मुलीने शिक्षकाकडूनच आपल्यावर वारंवार लैंगिक अत्याचार झाल्याची धक्कादायक माहिती दिली.
या घटनेमुळे हादरून गेलेल्या आईने तत्काळ गुहागर पोलीस ठाणे गाठून याप्रकरणी तक्रार दाखल केली. या गंभीर तक्रारीनंतर पोलिसांनी वेगाने तपासाला सुरुवात केली.
भारतीय दंड विधानाच्या कलम ३७६(क) सह बालकांचे लैंगिक अत्याचारापासून संरक्षण करणाऱ्या पोक्सो कायद्याच्या विविध कलमांनुसार आरोपीविरुद्ध गुन्हा दाखल करण्यात आला आणि चिपळूण येथील न्यायालयात दोषारोपपत्र सादर करण्यात आले.
या खटल्याचे कामकाज सुरू होण्यापूर्वीच पीडित मुलीच्या आईचे दुर्दैवी निधन झाले. परंतु, त्यानंतरही न्यायालयीन लढा आणि कायदेशीर प्रक्रिया सुरूच राहिली.
खटल्यादरम्यान सरकार पक्षाच्या वतीने एकूण दहा साक्षीदार तपासण्यात आले. सरकारी अभियोक्ता पुष्पराज शशिकांत शेट्ये यांनी भक्कम साक्षीपुरावे आणि प्रभावी युक्तिवादाच्या आधारे सरकार पक्षाची बाजू भक्कमपणे मांडली.
बचाव पक्षाचे म्हणणे आणि सरकार पक्षाने सादर केलेले पुरावे यांची सखोल छाननी केल्यानंतर न्यायालयाने आरोपी उदय वेल्हाळ याला दोषी ठरवत जन्मठेपेची शिक्षा सुनावली.
या प्रकरणाचा तपास पोलीस उपनिरीक्षक अश्विनी पाटील यांनी केला, तर पैरवी अधिकारी म्हणून पोलीस हेड कॉन्स्टेबल पी. भंडारी आणि ए. एस. शिंदे यांनी न्यायालयीन कामकाजात महत्त्वाची भूमिका बजावली.
शालेय विद्यार्थिनीवरील अत्याचाराच्या या प्रकरणात न्यायालयाने दिलेल्या या कठोर निकालामुळे बालकांच्या सुरक्षेचा प्रश्न आणि गुन्हेगारांवर वचक निर्माण करण्याच्या दृष्टीने एक अत्यंत कडक संदेश समाजात गेला आहे.