युक्रेनमधून भारतीयांना आणण्यासाठी तीन दिवसांत २६ विमाने पाठवणार’

रशियाचा युक्रेनवर हल्ला सलग सहाव्या दिवशीही सुरूच आहे. दरम्यान, ऑपरेशन गंगा अंतर्गत युक्रेनमध्ये अडकलेल्या भारतीयांना परत आणण्याचे अभियानही सुरू आहे.

याबाबत पंतप्रधान नरेंद्र मोदी यांनी मंगळवारी संध्याकाळी उच्चस्तरीय बैठक घेतली. युक्रेन प्रकरणी दोन दिवसांतील ही चौथी बैठक होती.

परराष्ट्र सचिव हर्षवर्धन श्रृंगला म्हणाले की, पंतप्रधानांनी युक्रेनमधून भारतीयांना बाहेर काढण्यासाठी ३ दिवसांत २६ विमाने पाठवण्याचा निर्णय घेतला आहे.

बुखारेस्ट आणि बुडापेस्ट व्यतिरिक्त, पोलंड आणि स्लोव्हाकमधील विमानतळांचा वापर भारतीयांना एअरलिफ्ट करण्यासाठी केला जाईल.

श्रृंगला म्हणाले की, पंतप्रधान नरेंद्र मोदी यांनी युक्रेनमध्ये भारतीय विद्यार्थी नवीन शेखरप्पा यांच्या मृत्यूबद्दल शोक व्यक्त केला आहे.

श्रृंगला पुढे म्हणाले की, जेव्हा आम्ही आमची पहिली अ‍ॅडव्हायझरी जारी केली तेव्हा युक्रेनमध्ये सुमारे २० हजार भारतीय विद्यार्थी होते.

तेव्हापासून सुमारे १२ हजार विद्यार्थी युक्रेन सोडून गेले आहेत. उर्वरित ४० टक्के विद्यार्थ्यांपैकी, सुमारे निम्मे संघर्ष झोनमध्ये आहेत आणि अर्धे युक्रेनच्या पश्चिम सीमेवर पोहोचले आहेत किंवा त्यांच्या मार्गावर आहेत.