महाराष्ट्राच्या वर्धा येथील जेनेटीक लाइफ सायन्स येथे एम्फोटेरिसिन बी इमल्शन इंजेक्शन तयार करण्यास सुरवात केली आहे. हे म्युकोरमायकोसिस अर्थात ब्लॅक फंगसच्या उपचारासाठी वापरले जात असल्याची माहिती केंद्रीय मंत्री नितीन गडकरी यांनी गुरुवारी दिली. केंद्रीय मंत्र्यांनी दिलेल्या माहितीनुसार याची किंमत प्रत्येकी १,२०० असणार आहे.
विशेष म्हणजे आज नितीन गडकरी यांचा वाढदिवस देखील आहे. अशातच गडकरींनी हे रिटर्न गिफ्ट दिलं आहे. गडकरींनी ब्लॅक फंगसवरील इजेक्शन बाजारात आणलं आहे. आतापर्यंत सात हजार किंमत असणारं हे इंजेक्शन आता १२०० रुपयात मिळणार आहे. देशात एम्फोटेरिसिन बी इमल्शन इंजेक्शनचं उत्पादन आतापर्यंत एकाच कंपनीतर्फे करण्यात येत होतं. आता वर्ध्याच्या जेनेटीक लाइफ सायन्सलादेखील याची निर्मिती करता येणार आहे. सोमवारपासून हे विक्री साठी बाजारात उपलब्ध होणार आहे.
केंद्रीय मंत्री श्री @nitin_gadkari जी की कोशिशों से कोविड के बाद तेज़ी से फैल रहे ब्लैक फंगस इन्फेक्शन के इलाज के लिये वर्धा में जेनेटेक लाईफ सायन्सेस ने Amphotericin B Emulsion इंजेक्शन तयार कर लिया है। अब तक भारत में एक ही कंपनी इसका उत्पाद करती थी। pic.twitter.com/X5M0IsCnp2
— Office Of Nitin Gadkari (@OfficeOfNG) May 27, 2021
म्युकोरमायकोसिस उपचारासाठी वापरल्या जाणार्‍या एम्फोटेरिसिन बी इमल्शन इंजेक्शनच्या २९,२५० अतिरिक्त कुपी राज्य व केंद्रशासित प्रदेशांना देण्यात आल्या आहेत अशी माहिती केंद्रीय रसायन व खते मंत्री सदानंद गौडा यांनी बुधवारी दिली होती.
दरम्यान, देशात करोनाचं संकट कमी होत असताना म्युकोरमायकोसिस अर्थात ब्लॅक फंगसने डोकं वर काढलं आहे. केंद्रीय आरोग्य मंत्रालयाकडून ब्लॅक फंगस झालेल्या रुग्णांची आकडेवारी जाहीर करण्यात आली होती. देशभरात एकूण ११ हजार ७१७ जणांना ब्लॅक फंगसची लागण झाल्याचं समोर आलं आहे. त्यात सर्वाधिक रुग्ण हे गुजरात आणि महाराष्ट्रात असल्याचं दिसून आलं आहे. ब्लॅक फंगसचे रुग्ण वाढत असल्याने आरोग्य मंत्रालयानेही चिंता व्यक्त केली आहे. यासाठी अनेक राज्यांनी ब्लॅक फंगसला साथीचा आजार घोषित केलं आहे.