वॉशिंग्टन: भारतामध्ये असलेला रेमडेसिवीर औषधांचा तुटवडा लक्षात घेता अमेरिकेतील ‘गिलियड सायन्स’ (US Drug firm Gilead Sciences ) या औषध कंपनीने मोठा निर्णय घेतला आहे. भारतात करोनाची वाढती साथ लक्षात घेता कंपनीकडून रेमडेसिवीरच्या किमान ४.५ लाख कुप्या ( (India gets free Remdesivir) मोफत देण्यात येणार असल्याचे कंपनीने म्हटले आहे.
भारतामधील करोना साथ पाहता कंपनीने प्रातिनिधिक पातळीवर तांत्रिक साह्यासाठी परवाना भागीदार उपलब्ध करून देत असल्याचे कंपनीने म्हटले आहे. त्याशिवाय स्थानिक उत्पादकांना साह्यभूत ठरतील, अशा सुविधा आणि रेमडेसिव्हिरचे उत्पादन वाढविण्यासाठी ‘अॅक्टिव्ह फार्मास्युटिकल इंग्रेडियंट’चा (एपीआय) पुरवठा करण्यात येणार आहे.
‘गिलियड सायन्स’चे मुख्य व्यावसायिक अधिकारी जोहाना मर्सियर यांनी म्हटले की, भारतात करोनाच्या उद्रेकामुळे आरोग्य व्यवस्थेवर ताण निर्माण झाला आहे. भारतामधील करोनासंकटाशी सामना करण्याशी आम्हाला जे काही करता येईल, ते करण्यास कटिबद्ध असल्याचे त्यांनी स्पष्ट केले. भारतातील सर्व सात परवानाधारक रेमडेसिवीर उत्पादकांनी उत्पादनासाठी आवश्यक असणाऱ्या सुविधा वाढवून औषध निर्मिती वाढवली असल्याचे कंपनीने म्हटले आहे.
दरम्यान, करोना संकटाने भारतातील आरोग्य यंत्रणेची पुरती दमछाक झाली आहे. ऑक्सिजन, वैद्यकीय उपकरणे, व्हेंटिलेटर, बेड, औषधे या स्वरूपात इतर देशांतून मदत केली जात आहे. भारतातील करोना संकटाला थोपवण्यासाठी आता अमेरिकेतील ४० कंपन्यांच्या सीईओने पुढाकार घेतला आहे. या सीईओंनी एका टास्क फोर्सची स्थापना केली असून त्या माध्यमातून भारताला आवश्यक साधनसामुग्रीची मदत केली जाणार आहे.
अमेरिकेतील आघाडीच्या ४० कंपन्यांच्या प्रमुखांनी भारताच्या मदतीसाठी पुढाकार घेतला आहे. या संदर्भात सोमवारी यूएस चेंबर्स ऑफ कॉमर्सच्या यूएस-इंडिया बिझनेस कौन्सिल आणि यूएस इंडिया स्ट्रॅटेजिक अँड पार्टनरशीप फोरमची बैठक पार पडली. लवकरच भारताला ४० हजार ऑक्सिजन मशीन देण्याचा निर्णय घेण्यात आल्याचे डेलॉइटचे मुख्य कार्यकारी अधिकारी पुनीत रंजन यांनी सांगितले.