दापोली : सायकलिंगचे फायदे लोकांपर्यंत पोहोचावेत आणि सायकल संस्कृतीला चालना मिळावी या उद्देशाने दापोली सायकलिंग क्लबतर्फे दापोली समर सायक्लोथॉन २०२५, सिझन ७ चे आयोजन ११ आणि १२ मे २०२५ रोजी सकाळी सोहनी विद्यामंदिर मैदान, दापोली येथे करण्यात येत आहे.
या स्पर्धेत राज्यभरातील नामांकित सायकलस्वार आपल्या कुटुंबासह सहभागी होणार असून, दापोली सायकलमय होण्यास सज्ज आहे.
या सायक्लोथॉनमध्ये वयाला मर्यादा नसल्याचे अनेक प्रेरणादायी सायकलस्वार सहभागी होत आहेत.
पुण्याच्या ७८ वर्षीय डॉ. निरुपमा भावे, ज्यांनी वयाच्या ७०व्या वर्षी पुणे ते कन्याकुमारी सायकल राईड करत वाढदिवस साजरा केला, त्या या स्पर्धेचा भाग असतील. त्यांनी वयाच्या ७२व्या वर्षी पुणे ते जम्मू, ७५व्या वर्षी पुणे ते कोलकाता, तसेच पंढरपूर ते घुमान (पंजाब) असे अनेक लांब अंतराचे प्रवास सायकलवर केले आहेत.
याशिवाय, श्रीनगर ते मुंबई ते कन्याकुमारी सायकलिंग करत जागतिक विक्रम नोंदवणारे ६८ वर्षीय सतीश जाधव, ७७ वर्षीय जुगल राठी, ७९ वर्षीय गौतम भिंगानिया, जगातील सर्वात उंच उमलिंगला पास सायकलवर सर करणारे ७३ वर्षीय डॉ. सुभाष कोकणे, तसेच जयश्री जाधव (वय ६२), राजू औटी (वय ६१), विजय हिंगे (वय ६५), अरुण नेवसे (वय ६४) आणि हेमलता राव (वय ६६) हे सायकलिंगच्या क्षेत्रात वयाला हद्दपार करणारे रायडर्स या स्पर्धेत आपली छाप पाडणार आहेत.
या सायकलस्वारांचे अनुभव ऐकणे आणि त्यांच्याशी संवाद साधणे हा नक्कीच अविस्मरणीय अनुभव ठरेल.
ही स्पर्धा १ ते १५० किमी अंतराची असून, ५० किमी कोस्टल सिनिक रुट, ४ ते १५० किमी शॉर्ट सिटी लूप आणि फन राईड अशा विविध गटांमध्ये आयोजित होईल. प्रत्येक सहभागीला आकर्षक मेडल आणि प्रमाणपत्र देऊन सन्मानित केले जाईल.
शॉर्ट सिटी लूप मार्गावर ५०, ७५, १००, १२५ आणि १५० किमी सायकलिंग पूर्ण करणाऱ्या स्पर्धकांना अनुक्रमे २००, ३००, ४००, ५०० आणि ६०० रुपये रोख बक्षिसे दिली जातील. याशिवाय काही विशेष बक्षिसांचाही समावेश आहे. १२ तासांत १५० किमी अंतर पूर्ण करण्याचे आव्हान स्पर्धकांसमोर असेल.
५० किमी कोस्टल सिनिक रुट हा मार्ग सोहनी विद्यामंदिर दापोली ते आसूद, सालदुरे, पाळंदे, बायपास रोड, आंजर्ले पूल, अडखळ, पाजपंढरी, हर्णै आणि परत दापोली असा समुद्रकिनाऱ्यावरील नयनरम्य गावांमधून जाईल.
मार्गावर स्वयंसेवक, पाणी, फळे, स्नॅक्स, बॅकअप टेम्पो आणि वैद्यकीय मदत उपलब्ध असेल. अधिक माहितीसाठी संपर्क क्रमांक ८६५५८७४४८६, ८७६७२८५८२७ आणि ९०२८७४१५९५ यावर संपर्क साधावा.