गॅस एजन्सीकडून त्रास होतोय? आता एका कॉलवर तक्रार करा; बुकिंगच्या नियमातही झाला मोठा बदल

दापोली:
सध्या मध्य पूर्वेतील तणावपूर्ण परिस्थितीमुळे जागतिक स्तरावर इंधन पुरवठ्यावर परिणाम होण्याची शक्यता वर्तवण्यात येत आहे. यामुळे देशांतर्गत एलपीजी (LPG) गॅसच्या उपलब्धतेबाबत नागरिकांमध्ये चिंतेचे वातावरण असतानाच, केंद्र सरकारने घरगुती गॅसचा पुरवठा सुरक्षित असल्याचे स्पष्ट करत दिलासा दिला आहे. मात्र, दुसरीकडे गॅस बुकिंगच्या नियमात महत्त्वाचे बदल करण्यात आले आहेत.

बुकिंग नियमात मोठा बदल: आता ४५ दिवसांची अट
घरगुती गॅस बुकिंगच्या प्रक्रियेत मोठा बदल झाला आहे. पूर्वी एका सिलिंडरनंतर पुढील बुकिंगसाठी २१ दिवसांचा कालावधी होता, जो नंतर २५ दिवस करण्यात आला होता. मात्र, आता हा कालावधी वाढवून थेट ४५ दिवस करण्यात आला आहे. म्हणजेच, एकदा सिलिंडर घेतल्यावर पुढील ४५ दिवसांपर्यंत ग्राहकांना नवीन बुकिंग करता येणार नाही. या बदलामुळे ग्राहकांना आता आपल्या गॅस वापराचे नियोजन अधिक काटेकोरपणे करावे लागणार आहे.

वितरकांकडून अडवणूक होत असल्यास तक्रार करा
काही भागांत गॅस सिलिंडरची वेळेवर डिलिव्हरी न मिळणे किंवा वितरकांकडून ग्राहकांची अडवणूक होण्याच्या तक्रारी समोर येत आहेत.

जर तुमचा गॅस वितरक (Distributor) विनाकारण उशीर करत असेल, जास्त पैशांची मागणी करत असेल किंवा गॅस चोरीची शंका असेल, तर ग्राहक थेट खालील अधिकृत टोल-फ्री क्रमांकावर तक्रार नोंदवू शकतात:

* इंडेन गॅस (Indane Gas): १८००-२३३३-५५५
   (बुकिंग व तक्रारीसाठी: ७७१८९५५५५५)
* भारत गॅस (Bharat Gas): १८००-२२-४३४४
   (बुकिंग नंबर: ७७१५०१२३४५)
* एचपी गॅस (HP Gas): १८००-२३३३-५५५
   (‘Anytime LPG’ सेवा: ९४९३६०२२२२)

अफवांवर विश्वास ठेवू नका
गॅस टंचाईच्या अफवांमुळे अनेक ठिकाणी ‘पॅनिक बुकिंग’चे प्रकार दिसत आहेत. मात्र, देशात पुरेसा साठा उपलब्ध असून सरकार परिस्थितीवर लक्ष ठेवून आहे. नागरिकांनी अफवांना बळी न पडता अधिकृत माहितीवर विश्वास ठेवावा. वितरकाकडून योग्य प्रतिसाद न मिळाल्यास आपल्या हक्काचा वापर करून हेल्पलाईनवर तक्रार नोंदवावी, असे आवाहन करण्यात आले आहे.