दापोली: निसर्ग संवर्धनाच्या दृष्टीने दापोली तालुक्यातील मुरुड समुद्रकिनारा पुन्हा एकदा चर्चेत आला असून येथे अत्यंत दुर्मिळ मानल्या जाणाऱ्या ‘ऑलिव्ह रिडले’ जातीच्या समुद्री कासवांच्या ४६ अंड्यांचे यशस्वी संवर्धन करण्यात आले आहे. ही अंडी सुरक्षित ठेवण्यासाठी स्थानिक ग्रामस्थ, वन विभाग आणि पर्यावरणप्रेमींनी एकत्र येत मोलाची कामगिरी बजावली आहे.
मुरुडच्या विस्तीर्ण किनाऱ्यावर ही अंडी आढळल्यानंतर, ती नैसर्गिक संकटे आणि भटक्या प्राण्यांपासून वाचवण्यासाठी तातडीने सुरक्षित ठिकाणी हलवण्यात आली.
या मोहिमेमध्ये कासव रक्षक राजेश शिगवण आणि दुर्गेश जाधव यांनी विशेष परिश्रम घेतले असून त्यांच्या सहकार्यामुळेच हे संवर्धन यशस्वी झाले आहे.
आता या अंड्यांमधून काही दिवसात पिल्ले बाहेर पडतील आणि त्यांना पुन्हा त्यांच्या नैसर्गिक अधिवासात म्हणजेच समुद्रात सोडले जाईल.
या उपक्रमामुळे मुरुड परिसरात समुद्री जैवविविधतेच्या संरक्षणाबाबत मोठी जनजागृती होत असून स्थानिकांच्या या कार्याचे सर्वत्र कौतुक होत आहे.
निसर्गाच्या पाहुण्यांसाठी मुरुडची ‘सुरक्षित कवच’ : एक विशेष कथा
मुरुडचा समुद्रकिनारा फक्त पर्यटनासाठीच नाही, तर निसर्गाच्या एका विलक्षण सोहळ्यासाठी ओळखला जातो. अथांग पसरलेला समुद्र आणि त्या लाटांच्या सोबतीने जेव्हा ‘ऑलिव्ह रिडले’ सारखे दुर्मिळ पाहुणे अंड्यांच्या रूपाने किनाऱ्यावर विसावतात, तेव्हा खऱ्या अर्थाने निसर्ग संवर्धनाची कसोटी लागते.
यावर्षी देखील मुरुडमध्ये ४६ मौल्यवान अंड्यांची भेट या कासवांनी दिली आहे. ही केवळ अंडी नसून ती समुद्री जीवसाखळीतील एक महत्त्वाचा दुवा आहेत. राजेश शिगवण आणि दुर्गेश जाधव यांच्यासारख्या कासव रक्षकांनी या अंड्यांभोवती सुरक्षेचे एक अभेद्य कवच उभे केले आहे.
भरतीचे पाणी किंवा शिकारी प्राण्यांची भीती असतानाही, या रक्षकांनी दिलेल्या पहार्यामुळे आता यातून नवीन जीव जन्माला येण्यासाठी सज्ज झाले आहेत.
जेव्हा ही चिमुकली पिल्ले वाळूतून बाहेर पडून समुद्राच्या दिशेने आपली पहिली पावले टाकतील, तेव्हा मुरुडच्या किनाऱ्यावर माणुसकी आणि निसर्गाचे एक अनोखे नाते पुन्हा एकदा अधोरेखित होईल.
Leave a Reply